NEGREIRA VETERANOS 2 - MADERAS RAMOS 4

Xornada negra para o noso equipo pois aparte do resultado negativo, que por esperado non deixa de ser frustrante, coincide coas victorias do USC e do Mirador de Padín que nos deixan novamente na zona de perigo.

E digo frustrante porque deixamos a sensación de que o Maderas gañou sen facer grandes cousas, o que dí ben pouco do noso plantel. Pero o máis preocupante foi a desunión que se palpa no ambiente o que ao final se reflicte sobre o campo. Xogadores que fan a guerra pola súa conta sen contar co grupo, outros que non seguen as directrices do mister, outros que buscan soamente a lucidez persoal, todos eles son datos que demostran que este ano é diferente nun aspecto no que precisamente éramos antaño líderes da categoría. E esa perda da nosa esencia está a minar ao equipo que non atopa a súa identidade. Quizáis gran parte da culpa esté en non saber transmitir á xente nova a filosofía da categoría e particularmente do noso equipo no que prima sobor de todo o grupo en tódalas súas vertentes. Non é aínda o momento de facer balances da temporada. Tempo haberá. Pero sí de facer reflexións de cara a un futuro no que unha gran parte do grupo vai entrando nunha idade na que pouco a pouco irá habendo retiradas e coido que é moi importante pensar en saber transmitir adecuadamente os nosos valores á xente que se vaia incorporando para tentar que siga perdurando o sabor veterano en Negreira.

Polo que respecta ao equipo, nada novo. Neste caso comenzamos inaugurando o marcador a cargo de Capi encaixado polo porteiro visitante que, xulgamos, non era especialista na materia, algo que non desmerece o disparo do bravo lateral. Nembargante, o Maderas chegaría ao descanso xa con vantaxe de 2-1 gracias ao bo traballo de Gelucho que fixo moito dano xogando entre liñas. Todo hai que dicilo, nalgunhas xogadas ao límite do orsai.

Na segunda parte tentamos apretar un pouco pero en dous arreóns logrou o Maderas matar o partido, novamente a través de Gelucho.

Con estes mimbres e tras a victoria do USC ante o Cuntis e do Mirador de Padín diante do Roomel, o Negreira volve novamente a moverse no alambre. Quedan dous partidos que, de gañalos, nos asegurarían a permanencia xa que gañar só un non asegura nada. Chama a atención o resultado do Pepe Noia, un dos poucos equipos aos que superamos con claridade, vencendo a domicilio ante o Dubra que nos goleou a pasada semana. Parece que todo está chamado a resolverse na última xornada onde nos xogaremos a permanencia co Don Budi e o USC terá un partido a vida ou morte co Mirador de Padín.

Por último, facer unha chamada de atención ao partido co Automic Barbanza no que haberá varias baixas. Non debe haber confianzas nin infravalorar ao colista da categoría. Doutro xeito poderíamos vernos abocados a non depender de nós mesmos na última xornada, algo que ten dobre valor do mesmo xeito que na Champións o ten os goles en campo contrario.

AUPA VETERANOS!