ZONA BASI

Esto non pode ser casualidade!
O do sábado era un das primeiras reválidas que ten que superar o equipo na que poderiamos chamar “costa de xaneiro”, neste caso adiantada ao mes de novembro. Neste mes o equipo enfrontarase ao Boqueixón, xa superado, ao Pepe Noya, ao Roomel e ao Maderas Ramos.
Pero o certo é que da a impresión de que é indeferente quen sexa o contrario namentras o equipo esté neste estado de forma. Pero non nos enganemos. O Boqueixón chegou algo máis arriba que os equipos aos que se enfrentou anteriormente. A diferencia é que noutras temporadas o contrario marcaba e logo facíase moi difícil remontar. Agora, a película é distinta. O Negreira leva o peso do partido, non lle pesa a responsabilidade, non esquivo o esférico e o máis importante, asfixia ao rival ata encoralo.
Tamén parece irrelevante cal sexa o equipo co que saia ao campo. Sexan cales sexan os xogadores que xoguen de inicio o equipo ten un sistema de xogo definido e cando hai rotacións o equipo non se resinte. Por iso queremos destacar a todos aqueles xogadores que por unha razón ou outra xogan menos minutos pero que están igual de comprometidos co clube cando saen ao terreno de xogo. Por eso, cando na segunda parte saíu Pablo, Ponte e Victor o equipo non afloxou en ningún momento o ritmo de partido.
Ao descanso chegouse con un 1-0, fruto dun gol de Cobas que estivo moi atento a un fallo da defensa do Boqueixón. O xogo nesta primeira metade estivo marcado pola batalla no medio do campo e con todo foi cando o Boqueixón máis se achegou á portería de Berdullas.
Tra-lo descanso houbo cambio de posicións, que non táctico, coa saída do campo de Juán de Corneira. O segundo gol só era cuestión de tempo e logo dunha xogada pola banda dereita de Couso, Nando remachou un rechaze do porteiro.
Por poñer un “pero” cómpre dicir que o equipo debe absterse de facer tantas faltas da metade do campo para atrás, sobre todo cando no equipo contrario hai tan bos lanzadores.
Logo dos resultados da xornada, o Negreira está mandando na táboa clasificatoria cun partido menos. É anecdótico, pois entre o primeiro e o sétimo hai 3 puntos de diferencia, pero menos se analizamos os números estatísticos: 1 partido empatado, 0 perdidos, un partido menos e o que é máis importante: 2 goles encaixados!
Que siga a racha! E que siga a afección acompañando ao equipo. Este sábado o campo da Penerada rexistrou outra entrada histórica.